Gen 25 | Ndebele | STEP | UAbrahama wasebuya wathatha umfazi, lebizo lakhe linguKetura.

1 UAbrahama wasebuya wathatha umfazi, lebizo lakhe linguKetura. 2 Wasemzalela uZimrani loJokishani loMedani loMidiyani loIshibaki loShuwa ^a. 3 UJokishani wasezala uShebha loDedani. Lamadodana kaDedani ayengamaAshuri lamaLetushi lamaLewumi. 4 Njalo amadodana kaMidiyani ayengoEfa loEferi loHanoki loAbida loElidaha. Wonke la ngamadodana kaKetura. 5 UAbrahama wasemupha uIsaka konke ayelakho ^b. 6 Kodwa kumadodana abafazi abancane uAbrahama ayelabo uAbrahama wanika izipho; wawasusa kuIsaka indodana yakhe ^c, esaphila, wawathuma empumalanga elizweni lempumalanga ^d.

7 Lalezi zinsuku zeminyaka yempilo kaAbrahama ayiphilayo, iminyaka elikhulu lamatshumi ayisikhombisa lanhlanu. 8 UAbrahama wasephela, wafa eseluphele kuhle emdala enele ^e, wabuthelwa ezizweni zakibo ^f. 9 UIsaka loIshmayeli amadodana akhe basebemngcwaba ^g obhalwini lweMakaphela, esiqintini sikaEfroni indodana kaZohari umHethi, esiqondene leMamre, 10 isiqinti uAbrahama asithenga emadodaneni akaHethi ^h; lapho uAbrahama wangcwatshwa loSara umkakhe ⁱ.

11 Kwasekusithi emva kokufa kukaAbrahama, uNkulunkulu wambusisa uIsaka indodana yakhe; uIsaka wasehlala emthonjeni iLahayi-Royi ^j.

Inzalo kaIshmayeli

12 Lalezi yizizukulwana zikaIshmayeli indodana kaAbrahama, uHagari umGibhithekazi, incekukazi kaSara, amzalela uAbrahama ^k. 13 Lala ngamabizo amadodana kaIshmayeli ^l ngamabizo awo njengokuzalwa kwawo; izibulo likaIshmayeli nguNebayothi, loKedari loAdibeli loMibisama 14 loMishima loDuma loMasa, 15 uHadadi loTema, uJeturi, uNafishi loKedema; 16 la ngamadodana kaIshmayeli, njalo la ngamabizo awo ngemizana yawo langezinqaba zawo, iziphathamandla ezilitshumi lambili ^m ngezizwe zawo. 17 Njalo le yiminyaka yempilo kaIshmayeli, iminyaka elikhulu lamatshumi amathathu lesikhombisa; wasephela, wafa, wabuthelwa ebantwini bakibo ⁿ. 18 Basebehlala kusukela eHavila ^o kusiya eShuri ^p ephambi kweGibhithe, ekuhambeni usiya eAsiriya; wahlala ^{▼▼ wahlala: Heb wawa.} phambi kobuso babafowabo bonke.

Ukuzalwa kukaEsawu loJakobe

19 Lalezi yizizukulwana zikaIsaka indodana kaAbrahama; uAbrahama wazala uIsaka ^r. 20 UIsaka wayeseleminyaka engamatshumi amane mhla ethatha uRebeka, indodakazi kaBethuweli ^s umSiriya wePadani-Arama ^t, udadewabo kaLabani ^u umSiriya, ukuba ngumkakhe. 21 UIsaka wasemncengela umkakhe eNkosini, ngoba wayeyinyumba; iNkosi yasincengeka ngaye ^v, kwaze kwathi uRebeka umkakhe wathatha isisu. 22 Abantwana babebindana-ke ngaphakathi kwakhe; wasesithi: Uba kunjalo, kungani nginje? Wasesiyabuza ^w iNkosi. 23 INkosi yasisithi kuye: Izizwe ezimbili zisesizalweni sakho ^x, izizwe ezimbili zizakwehlukana emibilini yakho. Njalo esinye isizwe sizakuba lamandla kulesinye isizwe, futhi omkhulu uzakhonza omncinyane ^y.

24 Kwathi sezigcwalisekile insuku zakhe zokubeletha, khangela-ke, amaphahla esiswini sakhe. 25 Kwasekuphuma owokuqala ebomvana, yena wonke enjengesembatho soboya ^z; ngakho bamutha ibizo lakhe bathi nguEsawu. 26 Njalo emva kwalokho kwaphuma umfowabo, lesandla sakhe sibambelele esithendeni sikaEsawu ^aa; basebebiza ibizo lakhe uJakobe ^ab. LoIsaka wayeleminyaka engamatshumi ayisithupha ekuzalweni kwabo. 27 Abafana basebekhula; uEsawu wasesiba ngumzingeli ohlakaniphileyo ^ac, umuntu weganga; loJakobe umuntu obekekileyo ^ad ehlala emathenteni ^ae. 28 Njalo uIsaka wayemthanda uEsawu ngoba wadla ^{▼▼ wadla: Heb inyama yenyamazana yayisemlonyeni wakhe.} inyama yenyamazana ^ag yakhe; kodwa uRebeka wathanda uJakobe ^ah.

29 Kwathi uJakobe esephekile ukudla okuphekiweyo, kwasekufika uEsawu evela egangeni, ekhathele. 30 UEsawu wasesithi kuJakobe: Ake ungivumele ngiginye kokubomvu lokho okubomvu, ngoba ngikhathele. Ngalokhu babiza ibizo lakhe ngokuthi uEdoma ^{▼▼ uEdoma: okuyikuthi, okubomvu.}. 31 UJakobe wasesithi: Ngithengisela lamuhla ilungelo lobuzibulo bakho. 32 UEsawu wasesithi: Khangela, sengizakufa; njalo liyini kimi ilungelo lobuzibulo? 33 UJakobe wasesithi: Funga kimi lamuhla. Wasefunga kuye, wathengisa ilungelo lobuzibulo bakhe kuJakobe ^aj. 34 UJakobe wasenika uEsawu isinkwa lokudla okuphekiweyo kwamalentili; wasesidla wanatha, wasukuma wahamba; ngalokho uEsawu wadelela ilungelo lobuzibulo bakhe ^ak.